සතියේ දිනවල රාත්රී 7.30 සිට 10.00 වනතෙක් රුපවාහිනිය නැරඹීමෙන් ඔබට සැබෑ දේශ ද්රෝහීන් හඳුනා ගැනීමට හැකි වන්නේ යයි යමෙකු ඔබට කිවහොත් ඔබ එය විශ්වාස කරන්නේද? වර්තමාන සමාජ ක්රමය හැඩ ගැසී ඇති ආකාරය දෙස බැලූ විට ශ්රව්ය දෘශ්ය මාධ්ය මගින් සමාජය මත පතිත කරන දෘෂ්ටි වාද අනෙකුත් සියල්ලට වඩා බොහෝ ප්රබලය. සාමාන්ය පුද්ගලයෙක් තම එදිනෙදා රාජකාරි අවසන්වී නිවසට පැමිණ රුපවාහිනිය ඉදිරියේ අසුන් ගත විට ඔහුට දකින්නට ලැබෙන දේ ගැන අප මොහොතක් සිතා බැලුවහොත් එය අනිවාර්යයෙන්ම ටෙලි නාටකයකි. එම නාටකවල ඇති බොහෝ චරිත මේ ලෝකයේ ඒවා නම් නොවේය. ඒවා බොහෝ දුරට සිහින ලෝකවල සිටින මිනිසුන් ගැන කියවෙන කතාය. නැතහොත් ඉතාම විනාශකාරී අයුරින් ළමා මනස දුෂ්ය කරන බොළඳ ආදර කතාය. මේවායේ කිසිදු පරමාදර්ශී චරිතයක් සොයා ගත නොහැකිය. එවන් නාටකයක් දින 100 නැරඹු කෙනෙකුට වුවද තම ජිවිතයට එකතු කළහැකි වටිනාකමක් සොයා ගත නොහැකිය. ඕනෑම සමාජයක් තම අභියෝග ජයගෙන ඉදිරියට යාමට නම් මිනිසුන්ගේ ආකල්ප වර්ධනය විය යුතුය. රුපවාහිනිය ගුවන් විදුලිය වැනි මාධ්ය ඒ සඳහා හොඳින්ම සරිලන මාධ්ය වේ. එවන් හැකියාවක් සහ තදබල උවමනාවකින් සමාජය පෙලෙන මේ මොහොතේ එය පැහැර හරිමින් සමාජය තවත් පරිහානියට පත් කරන එවන් වූ පුද්ගලයින් සැබෑ දේශ ද්රෝහීන් නොවන්නේද?
No comments:
Post a Comment